面對面
幕後大老爺 曾志偉
2010年02月17日56歲的曾志偉，除了是演員、電影監製、出品人、獎門人、台柱司儀、演藝人協會會長、明星足球隊中場、前上市公司東方魅力老闆、吳準少、笑口祖和韓琛以外，訪問這一天，我從《 72家租客》導演鍾樹佳口中得知，他還是大家口中的老爺。
只是，這個不是那種吃香喝辣欺負丫環的老爺，叫他老爺，是真的因為大家都靠曾志偉開工吃飯，也靠曾志偉出頭鳴不平。像是最近的鬧爆無綫縮皮用盡藝員事件，用無綫錢打無綫工開無綫戲竟然鬧無綫，全行也只有曾志偉夠膽死。
「我喺呢行仲有一個名，叫『曾醫生』你又知唔知？有咩奇難雜症，啲人都走嚟搵我。冇辦法，我同嗰類人接觸最多，佢哋有咩事咪入晒我數囉！」說的是流傳多年與關淑怡那段吊詭的緋聞。
對，提醒了我們，老爺和醫生以外，曾志偉在娛樂圈秘聞中的另一個身份，是與關淑怡之子關浚賢容貌「酷似」的親生老豆……身份之多，何只 72家？
專管閒事
成龍和譚詠麟，收收埋埋十幾年，兒子還不是要認；劉德華與朱麗倩，鬼鬼祟祟 24年，到頭來照樣被踢爆夫妻關係。所以說，娛樂圈的江湖傳聞，也不盡是空穴來風。
「黐線！冇可能！我係得兩個女兩個仔，幾多年都好，唔會無啦啦走多個出嚟！
「當事人無端端有個仔，人人都想知個老豆係邊個，自然要留意吓佢身邊有咩男人。我係呢行嘅曾醫生，專同呢類人接觸，咁啱喺佢身邊，又費事否認，咪入我數囉。香港地方唔大，娛樂雜誌數量就係全世界最多，唔吹水，每個星期邊有咁多嘢爆？
「唔係多管閒事，我 18歲入行，係呢行湊大我，我係對呢行嘅人同事有使命感。」
不是只對關淑怡兩母子有使命感，《 72家租客》，曾志偉入行的第 271部電影，也有傳為了冇錢收的無綫藝員謀福利與樂易玲紮馬上埋雜誌封面。
「呢件事絕對係俾人扭曲咗我嘅原意！方小姐（方逸華）搵我幫手，話邵氏要拍番電影，正中我下懷，點會同佢哋紮馬？家坐的士，成日撞到啲司機，呢個話自己以前係攝影師，嗰個係燈光師……香港以前幾多人拍電影，一年到尾幾多千萬大製作你知唔知？家最 top嘅去咗大陸、荷里活，剩番嗰啲一係冇工開，一係人工低到係侮辱，仲唔轉行咩？邵氏第一部電影《 Laughing Gor之變節》做好咗，以後一年開戲冇 10部都有 8部，對幕前幕後都係好事。大家今次拍戲都唔係為錢，眼光要放得遠啲！」
《 72家租客》首映，曾志偉又忍唔住發揮口臭本色，寸賀歲檔主要對手《花田囍事 2010》出品人黃百鳴：「我今年出嚟拍，都係見佢舊年套《家有囍事 2009》咁爛都收得咋嘛！」
01年遇襲後，一直與英皇一姐容祖兒面左左，近年有破冰跡象， 06年更鞠躬恭賀對方獲得最受歡迎女歌手大獎。《壹週刊》圖片
佛光初現
人人話全行最勤力係劉德華，我說是曾志偉。一年到尾電視電影大製作和爛片都見他的蹤影，開戲提拔新導演、慈善義演、演藝人協會例會從不缺席，籌備了 5年的賀歲片《 72家租客》終於成事，更是監製導演主演和宣傳全部攬上身。訪問這天，開了一上午會，整個下午做訪問，晚上直落出席首映，我問眼皮愈來愈往下墮、不停打喊露的曾志偉為甚麼要讓自己這麼累，他卻跟我說佛偈。
「倪匡話信耶穌係貪方便，信咗就有得上天堂，我 40歲嗰年信佛，係好似揀科咁，喺咁多個宗教當中揀個啱自己嘅。學佛，無他嘅，係畀自己愈活愈開心，係為死鋪路。
「 40歲之前讀書、搵錢係為生活鋪路。 40歲之後，搵到嘅錢都夠過世，咪為死鋪路囉。我真係好怕老，唔係驚年紀大機器壞，係睇得多啲孤孤獨獨嘅老人家，最怕老來寂寞。不停咁做嘢，包保唔會寂寞，最緊要郁得多，個人就唔會固執，唔會乞人憎。」
去年 6月，繼兩任妻子與關淑怡後，再爆出有陪開工、陪生日的紅顏知己，曾志偉說：「我唔係花心嘅人，雜誌寫嘅嘢，屋企人最清楚咩事。」
02年產子的關淑怡，兒子父親身份一直成謎。 8年以來，圈中人以曾志偉與兩母子關係最密切，被傳嫌疑最大。
唉，娛樂圈邊有黑勢力，有都扮緊做正行啦！
可能正是因為學佛後學會不再固執，曾志偉近年有傳與一向不咬弦的英皇老闆楊受成破冰，英皇旗下歌手也竟然出現《獎門人》玩遊戲。
「唉，一樣還一樣，我做嘢對事唔對人，啱嘅，咪請佢哋嚟囉！」
在大多後輩眼中是慈祥老爺的曾志偉，在圈中也以「口臭」出名。 01年就惹禍被三名大漢伏擊、額頭被縫 29針，當今天后容祖兒事後更被警方傳召協助調查。
「口臭，大部分係為咗節目效果。有陣時，就真係潛意識，我唔鍾意嗰樣嘢，咪講出聲囉。唉，娛樂圈邊有黑勢力，有都扮緊做正行啦！」
千億遺產案陳振聰敗訴被拘捕、龔仁心的一句：「善有善報、惡有惡報，若然未報、時候未到。」，志偉亦舉腳讚同：「事實擺喺面前，公道自在人心！」
非常爸爸
曾志偉 19歲與台灣歌星王美華結婚， 22歲離婚，兩個女兒交給定居於台灣的父母帶大。第二任妻子宋麗華則在為他誕下兩個兒子，兩人先同居生子，再於 89年圓婚。視提攜新人為己任的曾志偉，卻從來少見提攜入了行的長女曾寶儀和長子曾國祥，曾寶儀更曾在訪問中表示，對於父親錯過自己的成長遺憾不已。
「係真嘅，我一生人，的確擺喺屋企同仔女身上嘅時間最少，可能有一日，我會覺得好後悔都唔定。
「相處時間雖然唔多，但係我同仔女每次見面嘅質素都好高。兩個女，我由細到大都會成日同佢哋一齊睇戲食飯。大女(曾寶儀） 12歲嗰年，我第一次同佢單獨相處一次。 12歲，係剛剛開始認知嘅年紀，我覺得係一個好重要時機，等爸爸好應該了解吓個女，亦應該畀我個女知道爸爸忙緊啲乜，而爸爸媽媽當年又發生咩事。
01年小女兒結婚，一家人難得在加拿大聚頭：「家個外孫女都 8歲，我唔係淨係識做嘢，年年都有去加拿大搵外孫女玩 o架。」《壹週刊》圖片
女兒曾寶儀和兒子曾國祥都是行內人：「佢哋似我，嫌靠老豆肉酸，做嘢靠自己實力。不過其他困難，第一個諗起都係同我傾，我哋感情其實好好。」《蘋果日報》圖片
好多人話第一次好重要、又話要留畀老公。係咪真係咁重要呢？
「第二次，係佢 18歲生日，除咗同屋企人切蛋糕食飯，我再約佢出嚟兩父女過咗一日。我仲記得我話畀佢聽，你 18歲啦，好快要面對自己嘅第一次，好多人話第一次好重要、又話要留畀老公。係咪真係咁重要呢？老豆又唔覺得，留一世咁又點啫？咪仲驚！第一次最差嘅例子，係唔知點解之嘛。所以，我話畀阿女聽，唔緊要 o架，你知點解就得 o架啦。我咪就係呢種爸爸，同第二啲唔同囉！
「我有兩頭住家，一個同老婆，另外一個係做嘢方便，係怕夜晚阻住老婆休息、怕佢擔心。幾廿歲人，仲有咩好花心，識我嘅人個個都知，我邊有時間花心。都係多得啲週刊，我同老婆仔女溝通更緊密。我個女，連個頭染咗咩色都要話定畀我聽，就係費事屋企人有咩事，要經傳媒話畀我哋知。」
曾醫師
01年 1月，在港姐選舉與獎門人舞台劇前夕遇襲，曾志偉面腫眼腫用錄影帶承諾：「舞台見。」
入行 37年乜都做齊嘅曾志偉說，自己還有一個心願未了，就是學中醫。「三年前已經報咗公開大學讀中醫，返咗一堂就實在抽唔出時間再去……做人嘅嘢，年紀大機器壞，等於有人鍾意車一樣，年年拎去保養，不如自己學整車，利人利己之嘛！」
我倒覺得志偉還可以考慮學詠春，下次哪管他被三個大漢伏擊，十個都冇有怕啦！
撰文：朱小博
攝影：林子賢
0 评论:
發佈留言