「小飛機」怒插記者仔

插圖： Wendy

揞名爆

「小飛機」怒插記者仔

2010年02月12日

「小飛機」今年嘅成績不過不失，最勁都係三色台嗰個「最威水」獎。本來以佢今年嘅表現攞到呢個獎，大家都心知肚明啦。哈，原來呢個世界就係有一啲食韮菜唔食葱嘅人存在。

媽咪姐聽一個當晚喺現場嘅行家講，話說喺三色台個分豬肉儀式完咗之後，例牌有個記招，等啲得獎嘅歌手講吓自己感受。正當「小飛機」講到眉飛色舞之時，突然有個記者問「小飛機」，係咪因為四大派冇嚟佢先攞到呢個「威水獎」？「小飛機」一聽，即時黑面，敷衍兩句後即拉隊走人。
嗱，單嘢未完 o架。行家話收到料，原來「小飛機」當晚一返到公司，即拍枱大鬧，叫人 check吓個記者係邊間嘅？跟住又要公關高層親自打電話過去嗰間雜誌俾個老總，先將嗰個唔識死嘅記者插完一大輪之後，再要人哋唔好出嗰段訪問。
翌日，各報紙娛樂版一樣照登佢段訪問，咁都算枉作小人囉！