鬼馬揮春 陳奕迅薛凱琪創意贏晒

群星賀年

鬼馬揮春　陳奕迅薛凱琪創意贏晒

2010年02月12日

虎年虎虎生威，羣星急不及待即席揮毫，用自己個名寫揮春同大家拜年。「虎仔」 Eason同薛凱琪甚有創意， Eason勝在「諧」音字用得妙，薛凱琪則創意十足兼面部表情配合，正！

互動片段

群星鬼馬拜年 

【陳奕迅】一帆風迅

Eason：「精神奕奕？我個名就係咁嚟囉，不過都係一帆風順好啲！」 Eason笑笑口話：「打個交叉咪寫少幾筆囉！嘻嘻！」

【泳兒】泳結同心

泳兒呢句俾助手笑似結婚多過拜年，她即解釋：「今年年初一係情人節，泳結同心咪啱用囉！」又係喎！

【蔡卓妍】超卓妍麗

邊寫邊笑話：「我年年都係寫超卓妍麗 o架，因為我媽咪改我個名係咁樣嚟嘅。」

【陳偉霆】雷霆大吉

雷霆萬鈞就聽過，但 William呢句「雷霆大吉」就第一次見，不過 William對於自己嘅大作，顯然非常滿意，一臉得意。

【鄧麗欣】歡欣快樂

Stephy話舊年自己同公司都好多負面新聞，希望新一年可以少啲是非，做人「歡欣快樂」咁話。

【方大同】同時大吉

方大同同緋聞女友 Fiona果然心有靈犀，同樣是大吉大利，為免相同，即時改為「同時大吉」。

【薛凱琪】大吉大脷

讀番書的 Fiona，用僅餘識嘅中文字寫出大吉大脷（即舌「薛」），還加上公仔，之後以填顏色方式描繪出「撇捋橫勾」，最頂癮係佢做埋公仔個伸脷樣， cute爆。

【楊千嬅】萬紫千紅

做藝人呢行，梗係要多采多姿，一句萬紫千紅，就道盡千嬅更上一層樓的慾望。「至於呢句龍馬精神係贈自己嘅，舊年成日氣管敏感，希望個個都身體健康，龍馬精神啦！」千嬅梗係要龍馬精神啦，唔係邊有精神開演唱會、籌備年尾個婚宴兼實行造人大計呀！

【衞蘭】畫虎賀年

Janice唔識中文，所以畫老虎贈興，不過佢要求好高，畫咗成十分鐘至肯罷手：「唔好意思呀，阻你咁多時間。死啦，點解畫極都唔似嘅？」

【陳柏宇】節拍強勁

「嚟緊我要唱快歌，節拍強勁好重要！」他更將揮春倒轉，然後話︰「好似福到一樣，我要節拍強勁到！」咁都俾你諗到！

【商天娥】天天快樂

娥姐即將成為虎年新娘，想大家同佢一樣天天快樂，仲晒幸福話：「我今年唔做嘢 o架喇，要籌備婚禮，忙減肥呀。」

【石修】點石成金

聽記者提水後，但又半信半疑問：「點石成金得唔得 o架？唉，不過我又諗唔到第二句喎！」

【側田】有田有地

側田自認中文水皮，要助手幫佢諗諗寫乜，最後寫咗筆劃少的四字，佢望住自己的大作都忍唔住話：「哎吔，寫得好核突呀！意思搭夠啦！」

【謝雪心】心想事成

差啲以為心姐寫「心心相印」，佢話：「希望大家心想事成！想乜有乜！」

【鍾嘉欣】欣欣向榮

鍾嘉欣：「希望香港經濟、娛樂事業都欣欣向榮！樣樣都好，大家都好啦！」

【 Hotcha】大金拎走場內爆滿面載喜色

左起： Crystal、 Regen、 Winkie
近期快歌〈大場面〉喺電視日播夜播，就叫佢哋用呢三個字諗三句揮春， Regen寫了「場內爆滿」， Winkie即說：「哎吔，應該係場場爆滿呀，依家咪得一場囉！」 Regen接口：「唔緊要啦，紅館開到一場都好好啦！」

【 At 17】年年有爐灶得一再得二

左起：盧凱彤、林二汶
林二汶：「人係貪心嘅，祝大家得一再得二！」盧凱彤：「因為我鍾意煮嘢食，所以諗埋啲同食有關嘅，年年有爐灶即係有飯食，大家都有飽飯食！」

【馬浚偉】一馬當先

馬仔諗都唔使諗就寫下「一馬當先」，仲話：「希望所有嘢都一馬當先，拍劇收視、出碟，出書咩都樣樣第一。」

【陳嘉容】樂也容容

Eunis話：「嘩，考我呀？真係考起我喎，唔……融融樂樂，有冇呢句 o架？得唔得 o架？哈哈……我諗到，樂也容容咪得囉！」

【廖碧兒】富貴碧人

唔識中文嘅廖碧兒，要助手及經理人提水，不過佢好有心思，在揮春四角「雕花」，並沾沾自喜話︰「係咪咁先似樣呀？」

【鍾舒漫】鍾氣十足

「我希望自己中氣十足，可以夠氣唱多啲好歌。」

【 G.E.M.】棋開得勝

鄧紫棋：「呢句係我嘅 fans舉牌時寫過嘅，我覺得好啱用。」

【農夫】農馬精神夫可盡人

左起： C君、陸永
C君問陸永：「夫可盡人，咩嚟 o架！」陸永一臉認真答：「男人大丈夫，要盡力去做人。」咁都俾你諗到，收貨啦！

【周秀娜】秀到娜來

周秀娜好認真地想，最後用了自己個名兩個字拼成「秀（手）到娜（拿）來」，她笑說：「歪歪哋音都得啦。」

【林心如】事事如意

林心如快筆寫下「事事如意」，想愛情定工作如意呢？心如話：「事事都如意啦，咁我都想拍拖嘅。」

【李蘢怡】蘢馬精神

Tiffany笑謂好耐無拎過支毛筆，有啲緊張，要屏息靜氣，叫助手唔好引佢笑，驚會手震，終於一口氣寫完先識笑番。

【王菀之】飛上之變

Ivana用正宗揸毛筆方法，邊寫邊大讚：「呢支筆（科學毛筆）好勁呀，我啲字好似華仔咁靚呀，飛上『之』頭變嚿雲，大家明冇？」

【高海寧】步步高陞

新一代咪神高海寧，近來工作量大增，可以過肥年，唔怪得即時想到「步步高陞」，不過原來她除了身材了得，都寫得一手好字。

【周柏豪】周年旺相

柏豪唔靠人，堅持要自己動腦筋，不肯用助手的提示，最後終於諗到「周年旺相」，真是絞盡腦汁之作。