《女王辦公室》新人新戲勢

老細之下，職員之上嘅阿姐，職位雖高，好多時卻要受制於一班騎呢職員，搞到辦公室雞犬不寧。

電視有正嘢

《女王辦公室》新人新戲勢

2010年02月12日

新春伊始，先向各位讀者拜個早年：恭喜大家發大財！
言歸正傳。無綫處境劇一向有番咁上下水準，即如之前《畢打自己人》，由開始到完結，口碑及收視一路係有增冇減，原因在於劇情好之外，最主要就係用人得當。毛舜筠、黎耀祥，以及一班綠葉等，都俾到觀眾一個新鮮嘅感覺。而即將播出嘅新處境劇《女王辦公室》，演出及配搭嘅演員，亦令人眼前一亮。
此劇除飾演女王嘅汪明荃外，仲有無綫「新人」杜汶澤、劇集稀客何韻詩等。《女》喺大初九開始播出，新年、新劇、新人、新戲勢。

喺呢套劇入面，何韻詩可以話係最特別嘅一個。佢自 99年演過《反黑先鋒》後，就「退出」電視圈，專心唱歌。事隔 10年，佢又再次演出《女王辦公室》，但亦因為佢嘅演出而引起一啲是非。有人認為佢之所以答應拍劇，無非想喺《勁歌大獎》（即係 09年嘅《十大勁歌頒獎禮》）攞獎，亦有人話係解決經濟問題。而佢對呢啲八卦，只係答一句：純粹因為可以同阿姐合作先至「復出」。點都好啦，總之套劇好睇，觀眾又睇得開心就成功啦！

何韻詩入公司任職之初，擺明同阿媽汪明荃鬥氣，所以事事跟阿媽唱反調。

金剛（右一）喺《女》飾演陳永仁，為商場保安，跟宅男吳卓羲係老友。

呂慧儀飾演嘅宋初敏，標準港女一名；飾演張美君嘅馬賽（左）為吳卓羲女朋友。

為替轄下管理嘅商場搞旺個場，班職員親自出馬，扮鬼扮馬娛賓。

母女大鬥法

煩事一波接一波。公司事已經搞到頭大，又得為家事紛爭作調停。阿姐呢個女王真係唔易做。

好啦，講番入正題。無綫處境劇一向鍾意以辦公室政治為背景，《同事三分親》、《畢打自己人》係咁，呢套新劇亦唔例外。阿姐喺劇入面飾演秘書部嘅阿頭雷小鳳，身居要職，喺公司嘅威力直有凌駕於老細之勢，所以人人封佢「 Queen姐」，即係呢套劇嘅「女王」嘞。
可惜佢樹大招風，日日為咗辦公室嘅明爭暗鬥、時刻要跟唔同部門同事角力，已經筋疲力盡，點知又嚟咗三個新丁：公司前任男秘書施拾壹（杜汶澤）、宣傳部嘅凌笑淇（吳卓羲）及跟佢好多年冇聯絡嘅女兒繆惜之（何韻詩）。於是乎，一間本來好平凡嘅寫字樓就變成咗風聲鶴唳嘅戰場，日日上演群魔大戰。
而當中對佢最有威脅嘅，竟然係自己個女何韻詩。原來何一直都好嬲阿姐同自己老竇離婚，對自己又唔關心，所以喺辦公室入面，何韻詩跟阿姐就對着幹，係阿姐嘅頂心杉。於是，母女有母女鬥、同事有同事鬥，而且招式絕妙。

角色解構

汪明荃飾雷小鳳
公司阿姐級，做嘢果敢決斷。因為掌管整個公司嘅管治權，所以一副強悍戰鬥格，因而令自己陷入四面受敵之境。

何韻詩飾繆惜之
公司經理。做人處事遇強愈強，因為對阿媽嘅不滿而跟身為秘書嘅阿媽鬥氣。最後更為維護男朋友杜汶澤而怒炒阿媽魷魚。

杜汶澤飾施拾壹
公司前任秘書，因為阿姐而離職，轉過頭又受聘為何韻詩嘅秘書。最後更與何韻詩發展為情侶關係。

吳卓羲飾凌笑淇
標準宅男，任職公司宣傳部，係何韻詩好朋友，表面睇冇乜殺傷力，實則為「面懵心精」一族。

播映日期：

2月 22日起逢周一至周五晚 8:00pm翡翠及高清翡翠台

撰文：姜培綺