阿佘買 benz跑寸晒

阿佘泊好車走人，記者見車頭燈仲開着，好心提佢，但佢藐嘴懶理。

2010年02月19日

阿佘嘅緋聞真係十隻手指都數唔晒，相比換男友密度，阿佘對車就長情得多，之前佢揸嗰架 SLK 350 benz跑都揸咗四、五年，到最近先換新車，不過依然鍾情 benz跑。新車車價八十萬， 272匹馬力，啱晒鍾意揸辣車嘅阿佘要求。

哈,阿佘走咗一陣,車頭燈果然自動熄咗.
哈，阿佘走咗一陣，車頭燈果然自動熄咗。

新車落地半個月，阿佘已經帶佢遊勻港九新界。前幾日記者又見阿佘帶新玩具出巡，見佢泊好位但架車嘅車頭燈仲着緊喎，記者好心提阿佘熄燈，一次佢冇應，再同佢講多次，阿佘擰轉頭藐藐嘴話：「佢自動熄 o架！」啊，記者又見識多樣嘢囉，多謝阿佘賜教！

捱凍撼官恩娜

阿佘同官恩娜有乜共通點？
發電機？姣？性感？最重要呢，佢哋都同吳卓羲傳過緋聞。
年初三（ 16日）賀歲馬開鑼，阿佘同官恩娜齊齊做表演嘉賓，當日氣溫得 10度左右，官恩娜露出兩臂，凍到打晒冷震（左圖）。但阿佘仲勁，一襲低胸露臂薄紗裙任狂風吹冷雨打。唉，為咗撼贏舊情敵，冷傷風就唔抵啦！