未來外父身家過 2億 高皓正娶富貴老婆

 

32歲的高皓正下月迎娶生於富貴家庭的醫生女友 Jacqueline，並花盡積蓄搞婚禮，希望外父一家感受到他的誠意。

娛樂頂點

未來外父身家過 2億　高皓正娶富貴老婆

2010年02月19日

跟鄭秀文同是虔誠基督徒的高皓正，將於 3月 7日與醫生女友陸凱兒（ Jacqueline）拉埋天窗。高皓正娶得又靚又叻老婆當然值得高興，但原來未來外父陸宏隆亦非常猛料。他是樂善堂總理，又是著名皮膚科醫生，單是豪宅物業已有兩億，身家與住在油麻地舊樓的高皓正差天共地。
老婆屋企咁有米，無壓力就假！為免惹來閒言，高皓正決定孭起婚禮使費，不用外家一分一毫。難怪外父陸宏隆講起呢位準女婿都讚不絕口：「我鍾意阿正份人純品，使乜有錢！」

32歲的高皓正與女友 Jacqueline拍拖年多，到早前公布結婚，亦只稱未來老婆是政府醫院醫生，刻意將女友身份低調處理。直至近日派囍帖，身邊朋友才知高皓正外父原來是著名皮膚科醫生陸宏隆。陸宏隆坐擁九龍塘喇沙利道市值約 7千萬的七層獨立屋，據知屋內更設有升降機，非常豪華，加埋陸宏隆其他物業投資，身家超過兩億。反之出身清貧的阿正，一直以 7千元跟父親租住油麻地舊樓。

婚禮唔用外家錢

皮膚科醫生陸宏隆
高皓正外父陸宏隆是英國倫敦大學臨牀皮膚學碩士，現時在《東方日報》撰寫美容醫學專欄，他亦不時被邀出席有關皮膚問題的研討會，非常活躍。

現於大埔醫院任職精神科醫生的 Jacqueline，月入約四萬元，而高皓正現為阿叻的經理人公司 Starj的合約藝人，在無綫主持一星期一次的「至激校園」及 Road Show遊戲節目，平時偶爾接騷，工作量不多。以為高皓正娶有錢女，先要過五關斬六將，殊不知非常順利。知情者說：「阿正同 Jacqueline 3年前喺教會相識， 1年前開始拍拖，直到 Jacqueline帶阿正返屋企見家長，阿正先知佢咁有錢。不過女方父母唔單止無俾壓力佢哋，陸太知道阿正成日向其他歌手傳福音，又經常喺佈道會做見證，覺得個女同基督徒拍拖好可靠，仲成日催佢哋結婚㖭。」
對於記者知悉未來老婆家境有米，高皓正亦坦白承認，更說為免外人覺得他靠外家，故求婚後即向外父外母承諾，婚禮不用他們一分一毫。高皓正說：「我同外父外母講，雖然我唔係有錢，唔可以大排筵席，但我會傾盡全力，用晒我幾十萬積蓄搞婚禮，唔需要佢哋出錢。外母曾經提議婚後住喺佢哋投資嘅物業，我都拒絕咗。我希望靠自己，所以婚後會同老婆租住大埔中價單位，兩年後儲夠錢先買樓。」

外父勁讚純品

20圍酒席，高皓正佔 5圍，他宴請的圈中人包括當兄弟團的 Steven（左）、周永恒，還有他的老闆阿叻及教友關心妍（右）。

外父陸宏隆有頭有面，但高皓正的婚禮只在薄扶林一間只容納 100人的伯大尼小教堂行禮，晚上在 W Hotel筵開廿席，絕不鋪張。高皓正說難得外父體諒，「起初佢哋好想擺 100圍，但我能力只能擺到 20圍，好多謝外父無俾壓力我。我知外父賓客個個都有頭有面，我同 Jacqueline都想好好招呼佢哋，為咗令賓客食到原隻鮑魚，我每圍加 3千幾蚊，去到 16,000一圍，希望賓客食得開心。」
對於未來女婿高皓正，陸宏隆亦有讚無彈，更不介意嫁女無六星級酒店排場，「點為之有錢，總之女婿唔係無錢就得。況且我女都咁大個，佢揀得我就信佢眼光。阿正斯文又靚仔，最重要係佢份人純品，又真心錫我個女嘛。婚禮唔需要大搞，請班好親密嘅親友嚟食餐飯，人少少仲溫馨。佢哋成個婚禮都唔使我煩，我覺得阿正搞得好好。（咁你俾幾多分呢位女婿？）我做醫生俾分好嚴謹， 70分先為之合格，阿正一定有 70分。（僅僅合格咋！）醫生唔可以太鬆手，哈哈！」

外父 2億身家

九龍塘寓所市值$7,000萬
陸宏隆 99年以約 4,000萬買九龍塘獨立屋與家人同住，現已升值至約 7,000萬。

皇后大道中商舖市值$9,000萬
陸宏隆 04年底豪擲 5,500萬買入中環皇后大道中 9號 3樓約 5,000呎商舖單位，現市值約 9,000萬。

凱旋門物業市值$4,000萬
06年陸宏隆以 2,800多萬一手買入凱旋門 2座高層約 1,850呎單位，現升值至約 4,000萬。

高皓正平租舊樓　月租$7,000
高皓正租住油麻地有 43年樓齡的禮基大廈，租金約 7,000元。

慳家婚紗相之旅

高皓正早前與未來太太 Jacqueline到新興旅遊點斐濟羣島拍攝婚紗照，因為有 Starj Wedding贊助， 6日的拍攝行程只用了兩萬元，慳番唔少。

高皓正未來外父陸宏隆醫生雖然有兩億物業，但他表示婚後會先跟太太租住大埔單位，過兩年才買樓生 BB，一於要靠自己。

可愛囍帖
高皓正是歌手出身，老婆則任職醫生，所以請柬亦以一對新人的職業打扮設計，非常有趣可愛。

63萬娶億萬新娘

雖然高皓正同老婆 Jacqueline背景可謂貧富懸殊，但攜手走進教堂絕對講心唔講金。高皓正花盡 63萬積蓄娶富家女，絕對有誠意。

禮金︰$10萬
W Hotel酒席連酒水$1萬 6千× 20圍︰$32萬
伯大尼教堂︰$4萬
斐濟群島影婚紗相︰$2萬
D級 1卡鑽石結婚戒指︰$10萬
新人化妝整頭︰$2萬
開門利是︰$1萬
其他雜項︰$2萬
合共$63萬

撰文：娛樂組
攝影：攝影組

壹傳媒互動有限公司 版權所有 不得轉載

TVB Channel http://www.tvbchannel.com