小心失儀

社交圈

小心失儀

2010年02月11日女人怕走光，以為貼膠紙就得，點知穿崩露膠紙兼黐埋其他嘢仲衰；著迷你短裙上落車顧實儀態，偏偏影相一刻就擘大髀，幾靚都假。

汪圓圓　弄巧反拙

上週二又一城迎新歲活動，學過古箏的甄子丹姨仔汪圓圓任表演嘉賓，仲要係著前後勁 Deep V的 Moiselle珠片裙，「之前睇相都唔覺咁性感，現場著條裙又鬆，我成世女都未黐過咁多膠紙，到除衫時會好難。」膠紙黐力有限，郁兩下走晒位，最慘係黐埋現場灑落嚟嘅縐紙碎，都幾肉酸。

何傲兒　黐膠波

有份出席又一城活動嘅前港姐何傲兒亦好小心，兩邊胸黐晒雙面膠紙防走光。點知活動中途膠紙唔聽話凸咗出嚟，即時露罅變露膠。

諸葛梓岐　爆大鑊

諸葛梓岐獻技玩扯鈴，見她努力拉住兩邊繩頭，但扯來扯去都喺地上碌，她惟有尷尬地執起扯鈴擺甫士了事。唔識玩係閒事，諸葛梓岐爆陳法拉已婚才是戲肉，「無論點樣都好，都祝佢幸福快樂，其實都係開心事。」即係二人已婚？她「哈哈哈哈」不置可否。

陳沛嘉　走狗

去年結咗婚嘅模特兒陳沛嘉，上週四帶埋兩隻養咗三年嘅西摩狗出席愛護動物協會喺中區警署搞嘅活動。陳沛嘉話：「今日帶佢哋洗過邋遢。」可惜兩隻狗唔聽話，見工人派狗糧（圓圖）即刻走去搶食，搞到陳小姐鬼咁狼狽。

何超雲　擘髀

何超雲上週五著住條短到暈嘅 Givenchy裙出席浪琴錶活動，行埋布景板時佢唔知企邊度影相先好，結果出現大字形甫士。問何厚鏵姪兒何敬豐是否追求她？她又失言話：「佢仲細粒過你哋。」上車離開時，超雲就好有儀態地夾實對腳攝入車，腿功好到家。

胡敏珊　拍檔情人

跟龐維仁（圓圖）分咗手的胡敏珊，上週三以女友兼拍檔身份，到新男友 Mat喺銅鑼灣新開的潮店 Rock Candy crossover，拍照時 Mat緊張地叫女友拉高心口位，驚死走光。但現場無乜人發現 Mat同胡小姐嘅關係，仲問佢會否跟龐生復合，「唔知 o架，可能會一齊番都唔定。」