尹佬走得好安詳！
記招在九龍塘一會所舉行，吸引近百記者採訪，戴上黑超嘅米雪強忍淚水表示稍後會為尹佬舉行追悼會。
媽咪姐手帳
尹佬病逝 激瘦米雪強撐開工
2010年02月19日今個新年望住娛樂版頭條，媽咪姐心情猶如坐過山車。初一見到 42歲陳小春娶 26歲應采兒，兩個人又喊又笑共諧連理。點知紅事緊接而嚟係白事，初三尹志強因癌症引致嚴重後遺症，身體器官機能衰竭病逝，享年 53歲。
互動片段
強撐開記招激瘦米雪：尹佬走得好安詳92年證實患上第一期鼻咽癌嘅尹佬，接受電療後病情一度好轉，可惜到 08年健康每況愈下。臨走時，除雙目失明外，體重亦由最初 160磅急降至臨終時只得 80磅。尹佬彌留之際，米雪同家人都喺身邊，陪佢走完人生最後一段路。
周三（初四）下晝 1點，身穿黑衣黑褲戴住墨鏡、冇化妝嘅米雪舉行記招交待事件，比起兩日前出席新春活動時，面頰明顯消瘦憔悴，見佢行步路都腳步浮浮，媽咪姐睇到都心痛。
對於男友離逝，米雪黯然說：「好感謝上天俾尹佬有一段咁美好嘅人生，孝順、樂天、帶俾人歡樂嘅性格，佢走嘅時候好安詳、堅強同勇敢，佢對生命嘅熾熱永遠留喺大家心中。上天一定會對好嘅人作最好嘅安排，我哋會永遠懷念佢。」短短一分鐘講話之中，米雪堅強忍住眼淚，但難掩悲痛心情。記招後，米雪更向在場傳媒微微鞠躬。而另一方面，尹佬兩位妹妹則到沙田富山殮房認屍，被問到尹佬身後事安排，一位妹妹說：「交俾阿嫂（指米雪）搞。」據知情人士透露：「尹佬走咗，米記（米雪）呢兩日唔知喊咗幾多次，公司叫佢休息幾日，但佢驚影響進度，又驚自己留喺屋企亂諗嘢，開完記招就即刻開工拍《女人最痛》。」無綫外事部副總監曾醒明承認說：「米雪呢幾日都會開工，佢話唔想影響拍攝進度，佢咁敬業樂業嘅精神，公司都覺得好感動。」
米雪離開會場時腳步浮浮，身穿黑衫黑褲嘅佢更顯得憔悴消瘦。
尹志強
1956-2010
尹志強 08年開始病情反覆，一直居於大埔村屋養病，至近月才搬到胞妹位於元朗加州花園寓所。據知由於尹佬生前用盡積蓄醫病，遺產所剩不多。
尹佬和米雪自 84年拍拖，相戀達 26年，只是欠了一紙婚書，但早已是公認的老夫老妻。
尹佬離世前一天，米雪還打扮紅彤彤現身《都市閑情》節目。
周二上午尹佬彌留之際，米雪與尹佬家人一直陪住他，至中午，米雪（圈）才掩面離開沙田威爾斯親王醫院。《蘋果日報》圖片
至 4時許，尹佬遺體由仵工移送殮房。
未完結婚心願
尹佬病逝當日，米雪妹妹雪梨於下午 4時許到米雪亞皆老街寓所打點，其間她神情哀傷未有發言。
多年嚟受盡病魔折騰，除咗尹佬身心痛苦，身邊人米雪亦唔好過。同尹佬相戀達 26載嘅米雪，多年嚟東奔西走到各地搵靈丹妙藥幫男友醫病，每日更使過萬幫尹佬打「鏢靶」針續命。為籌龐大醫藥費，米雪除不斷接劇，又返內地剪綵登台，雖然身心俱疲，但人前人後依然保持招牌笑容。尹佬離世，米雪最遺憾係自己未能成為尹太。「米記其實一早諗定同尹佬結婚，佢兩個仲講話想學阿姐同羅家英喺拉斯維加斯嗰度結婚，不過米記見尹佬病情唔穩定，擔心佢搭長途機頂唔順，所以諗住遲啲先再諗，點知尹佬咁就走咗！」知情者說。
人生最痛，莫過於同摯親生離死別，媽咪姐衷心希望米雪走出哀痛，堅強活下去。
尹佬外甥梁漢文亦有出席記者會，他說：「呢個病纏擾咗舅父一段時間，親友屋企人都唔好受，佢同癌病抗衡嘅毅力係好值得香港人學習。」記者會舉行了十分鐘，離開時米雪向傳媒鞠躬表示謝意。
記招後，米雪先由工作人員接載到位於亞皆老街的寓所，之後登上自己座駕，在工作人員開路下，自己揸車到九龍塘開工拍劇，認真堅強。她說：「我唔想影響到其他演員。」
尹志強精采一生
球壇：尹志強終年僅 53歲，不過生活精采，朋友眾多，可謂不枉此生。
在堅道中學畢業的尹佬， 70年代，効力南華和精工等球會，由於他頭鎚和腳法均了得，當香港足球代表隊主力，更有「亞洲第一中鋒」美譽。他六度入選香港足球明星隊，與譚詠麟、陳百祥等娛圈中人稔熟。 89年才掛靴，當年他才 33歲。
娛圈：尹佬 81年參演首套電影《單程路》， 89年簽約亞視成為基本演員，之後演過多套電視劇。參與《無間道》系列較為人印象深刻，至 04年他演出《 2004新紮師兄》後息影。
從商：尹佬曾經營高爾夫球服裝公司（ Wansports）， 01年於創業板上市，惟 05年因病辭去主席及執行董事職務。
感情：尹佬 83年邂逅米雪，相戀 26載，縱使尹佬近年與癌魔搏鬥，二人坦言曾考慮結婚。
《壹週刊》圖片
《無間道 III》
《壹週刊》圖片
壹傳媒互動有限公司 版權所有 不得轉載
TVB Channel http://www.tvbchannel.com
0 评论:
發佈留言