句句金

2010年02月19日

今年港產賀歲片特多，甄子丹嘅《錦衣衛》、黃百鳴一套《花田囍事》、曾志偉一套《 72家租客》，三人為爭票房 No.1，不約而同出口術踩對方，引發罵戰。

撐自己部《錦衣衛》絕對可以喺大陸、東南亞市場撼低《花田囍事》：
真係單手都可以打贏佢啦！
一日未落畫，一日都唔知賽果，媽咪姐淨係聽過一句「驕兵必敗」啫。

志偉聽到甄子丹嘅豪氣論，忍唔住窒佢，話甄子丹今次喺戲中只用兵器唔使用手，
我求其搵兩把口都贏佢。
其實講到咁大，一陣間輸咗咪仲。呢啲口舌之爭真係好冇謂。

最終結果係點，未知。不過特別優先場嘅票房已經出咗嚟，《花田囍事》稍勝《 72家租客》，身為《花》片製作人嘅黃百鳴就暗寸：
得把口講有乜用！
都係黃百鳴呢句啱聽，講呢個個都天下無敵，倒不如做出啲成績再耀武揚威都未遲。

今年大年初一撞正情人節，有人歡喜有人愁。

葉翠翠向來多桃花，有人問佢情人節有咩 plan？佢話冇人約，
會一個人混吉。
翠翠唔單止多桃花，仲出名多是非，情人節一個人過，未嘗唔係好事。

陳偉霆被傳跟師姐阿嬌撻着，前緋聞女友 Angelababy未有着落，不禁酸溜溜咁話：
唔覺得（佢哋）襯。
襯唔襯係人哋嘅事，最重要係 Angelababy搵到個襯自己嘅啫。你咪有個 o架仔嘅。

有報道指陳豪、佘詩曼拍拖，廖碧兒冇佢哋咁好氣，一於寄情工作，忙到情人節都唔得閒：
自己都約唔到自己呀！
咁又係，費事眼冤啦，搵真銀好過。