阿佘新車 Benz跑剛剛落地兩星期，近日每逢開工，出街都親自揸車，同新車聯絡感情。
探熱針
撻着陳豪 佘詩曼狂喜買 80萬 Benz跑
2010年02月18日飛甩鄭嘉穎後，佘詩曼感情真空接近半年，直到最近因為與陳豪同時合作《天與地》及《公主嫁到》，連續五個月日對夜對，終於傳出陳豪以咖啡攻勢，溝掂阿佘。
感情有着落，加上去年狂賺千五萬，事業愛情兩得意的阿佘，上月尾就以一炮過，購入價值八十萬 Benz E350，獎勵自己。
新車落地
佘詩曼因為《宮心計》帶挈，去年瘋狂吸金，總收入達到一千五百萬，成為無綫首席最賺錢藝人。有見及此，阿佘在個多月前扑槌換車，被點中的新款 Benz E350 Coupe，車價八十萬，有 3498c.c V6引擎， 272匹馬力，睇得又片得，完全符合向來鍾意揸辣車的阿佘要求。
人逢喜事，手都爽啲，阿佘手起刀落，實行一炮過俾晒錢。
「阿佘一直都想換車，之前嗰架 Benz都揸咗成五年，不過揀咗好耐都唔啱，直至知道 Benz E系出咗部 Coupe，架車一到佢即刻去陳列室睇，仲要一見鍾情即刻扑槌買，佢一次過俾晒錢唔上會，非常手爽。」阿佘身邊人說。
在片場阿佘同陳豪鏡頭前後都玩得好埋，陳豪更不時做出趣怪動作氹阿佘開心。
二月五日陳豪同阿佘繑住手一齊到新加坡出席頒獎禮。
目前阿佘與陳豪除了一齊拍《公主嫁到》外，更在另一套劇集《天與地》中有感情戲，難怪被傳日久生情。
拍攝當日，當陳豪未出現前，阿佘無厘心機，經常行埋一邊用 iPhone傳短訊。
以往陳豪同廖碧兒經常以情侶檔姿態出現，但近年已愈來愈少見。
片場傳情
新車落地外，撇甩鄭嘉穎的阿佘已經「守齋」六個月，直至最近才傳出她與陳豪撻着，兩人秘密拍拖。但兩人同時作出否認，阿佘更拉埋陳豪另一緋聞女友落水，「一杯咖啡就咁大件事，又唔係買間屋俾我，我人情都做定俾佢（陳豪）啦！（做俾佢同邊個先？）咁我又唔知，問番兩個當事人啦。」
雖然攞出廖碧兒做擋箭牌，但日前在《公主嫁到》拍攝現場，記者就目擊阿佘同陳豪鏡頭前後都毫無避忌，戲裡戲外打情罵俏，玩得十分開心。一句講晒，無風唔起浪。
唔貴唔買
阿佘揸 80萬 E仔（ E Class）貴絕同行花旦，小生界代表就有吳卓羲，兩個曾經傳過緋聞，又係識車之人，果然好啱 key。
吳卓羲 平治 SL500 178萬
（《忽然 1周》圖片）
由 Audi Allroad到日產 Fairlady Z，吳卓羲架架「辣嘢」，但舊年年尾自稱心態唔同晒，揸車最緊要舒服，改車響喉入彎甩尾唔再係佢杯茶喎！
楊怡 福士 EOS 40萬
（《忽然 1周》圖片）
由可愛 Mini Cooper轉揸外表斯文速度驚人嘅福士 EOS，同緋聞男友黎諾懿出街，揸住佢撇甩記者冇難度。
馬德鐘 波子 Cayenne 80萬
近年修心養性嘅馬德鐘，買車最緊要方便屋企人，於是由兩座位 Lexus SC430，變成外形靚仔、車廂又夠寬敞嘅 Porsche Cayenne，作為 family car，圈中擁躉仲有李克勤同張栢芝。
撰文、攝影：娛樂組
mailto:nextb@nextmedia.com
0 评论:
發佈留言