《老公萬歲》張可頤變身惡妻

張可頤喺劇入面嘅角色係性格豪邁，作風江湖味濃嘅老婆；而苗僑偉則喺其高壓管治下，變咗隻鵪鶉。

電視有正嘢

《老公萬歲》張可頤變身惡妻

2010年02月05日

繼袁詠儀、毛舜筠同戚美珍之後，因為甲狀腺炎而休息咗四年冇喺熒幕出現嘅張可頤，喺舊年 3月復出，孭飛演出《老公萬歲》。同劇仲有苗僑偉、謝天華及李綺紅。
《老》係小品式時裝喜劇，張可頤嘅角色係既惡死又醋味勁濃嘅女人。而苗僑偉則完全放棄咗《學警雄心》嘅威武形象，變身為一個小男人。《老公萬歲》充滿「喜戲」，作為賀歲劇，十分應景。

張可頤久休復出頭炮，就係同苗僑偉拍檔嘅《老公萬歲》。其實喺四年前，佢哋兩個原本要拍《上海傳奇》，可惜張可頤因為甲狀腺炎而被逼休息，以致合作無緣。估唔到四年後，兩人又可以再續前緣，合拍無綫新劇《老公萬歲》。

謝天華喺《老》飾演一腳踏幾船嘅花弗男，更先後跟曹敏莉（上）及李綺紅（下）喺水中激吻。雖然事後被曹指其有鹹豬嘴之嫌，但亦可謂艷福無邊。

所謂物極必反。苗僑偉喺細佬謝天華及一班損友慫恿下，竟然偷上深圳沙沙滾。

惡妻與小男人

張可頤喺劇中盡量發揮佢嘅喜劇細胞，飾演苗僑偉個老婆，係一個好重江湖味兼倀雞嘅女人高勵心；而苗僑偉係一個長期受惡妻高壓折磨嘅小男人程琛。
《老》嘅古仔就以佢兩公婆為主線。飾演苗細佬程義嘅謝天華，自命為情場浪子，對大佬嘅遭遇既同情又覺得好笑，不時自薦做大佬嘅軍師，可惜呢個軍師係一條「蠶蟲」嚟，幾乎搞到苗同張離婚。其實佢自己亦自身難保，因為過於花弗，差啲累到自己變雙失——失業兼失戀。
順帶講少少八卦嘢：喺拍劇期間，曾經鬧出鹹豬嘴風波。曹敏莉篤爆，指謝天華喺一場本來只係錫吓面嘅戲入面，主動要求加料變咗錫嘴，更由點到即止變長咀。事後監製唐基明為息事寧人，話演員有要求都係為部劇好。加上其他演員亦力撐謝天華，事件才不了了之。

播映日期： 2月 16日（周二）起逢周一至周五晚 9:30pm
翡翠及高清翡翠台

張可頤為打響回歸頭炮，喺新劇記招上面，配合劇情，手執雞毛掃，盡顯劇中惡妻形象。

《情人眼裏高一 D》情人節賀禮

如果《老公萬歲》係賀歲劇，咁接《畢打自己人》嘅《情人眼裏高一 D》，可以講係為情人節而備。
話《情》係食住王祖藍之前一部電影《矮仔多情》嘅延續，絕不為過。王祖藍喺劇入面飾演雖然擁有一把靚聲，但因為人矮兼唔靚仔而自卑嘅恭因銅。一次偶然之下得到一包可以令人由矮變高、由肥變瘦、由醜變靚嘅朱古力。王食咗一粒之後，立即變身萬人迷，於是將自己改名為廑（音勤）力信（黃宗澤飾）。王改頭換面之後，不單紅爆娛樂圈，更成為好多女藝人追求對象。與此同時，王發現其私人助理荊止高（阮小儀）都服食咗神奇朱古力。之後會點？咁就要大家自己慢慢品嚐一連六集嘅情人節甜品嘞。

王祖藍食咗神奇朱古力變身黃宗澤後，立即成為萬人迷，被大班 fans狂追。更連圈中出名嘅美女徐子珊飾演嘅謝安腓亦對其展開追求（下圖）。

俾個煲劇提示大家：

《情》播出係分三個時段：第一集會安排喺 2月 15日（周一）晚八點三十五分； 2月 16日起周二至周五晚八點播出第二至第五集、 2月 20日（周六）晚 9:30pm播出第六集。翡翠及高清翡翠台同步播映。

劇中嘅王祖藍靚聲王，無奈其貌不揚，加上係「人無三吋高」嘅矮仔，令到佢因自卑而變成宅男。

撰文：姜培綺